بعض الافكار المنزلية تحتاجها كل امرأة في بيتها

timthumb

 

 

 

هذه بعض الافكار المنزلية تحتاجها كل امرأة في بيتها

 

 

***************************************

1 ــ باش الخبز المجمد يرجع بحال الى يلاه عجنتيه ملي تخرجيه سخني الفران على اعلى درجة ودخليه فيه وبعد دقيقة طفي الفران وخليه2 حتى 3 دقائق وخرجيه وقدميه هذيك الساعة والى كان خبز السوق ملي تخرجيه دوزيه تحت الروبيني ودخليه للفران وقدميه هذيك الساعة وبالصحة والراحة

 

 

2 ــ الى بغيتي ماء الروبيني يجيك طعمو مزيان ولذيذ وتتحيد منو طغمة لكلور كاين جوج طرق بدون تكاليف

الطريقة الاولى عمري القرعة ديال ماء وحطي فيها عريش ديال النعناع الطري والى بغيتي زيدي عليها قطرتين ديال الحامض وهاهو ماء طعمو زوين وحتى النعناع كايعطيه منظر زوين

والطريقة الثانية عمري لقراعي ودخليهم لثلاجة قبل يتشربو بساعتين وريحة لكلور كاتتحيد منو

 

3 ــ الى بغيتي تحيدي الكالكير من لماعن من المصلوح من ماكينة القهوة لمقراج وغيرهم

عندك جوج حلول الحل الاول تبيتي فيهم ثلث المقدار اللي يعمرهم من الخل لبيض وثلثين ماء وتخليهم حتى لصباح وشليهم

والحل الثاني وهو يخص الطناجر لكاسرولات والمقارج ديري فيهم قشور لبطاطة والماء وخليهم يطيبو فيهم وغسليهم وشليهم وهاهما جداد

 

4 ــ الى بغيتي تحيدي لكحولية ديال لحوايج لمحروقين من المصلوح شدي ورق جريدة وحطي عليه الملح لبيض الرقيق وسخني المصلوح وبقاي ديري بحال الى تصلحي هذاك الملحة حتى تتحيد لكحولية ولي تراص ويرجع المصلوح جديد

 

5 ــ الى بغيتي كيسان وفازات وطباسل الزاج ولكريسطال يرجعو جداد ويشعلو شدي قشور بطاطة (قبل ماتنقي لبطاطة غسليها من التراب ولوسخ) وديريهم في الماء السخون وديري لماعن فيها وخليهم مرقدين ومرة مرة حركي الكيسان بدون ماتهرسيهم ههههههه وملي يقرب الماء يبرد خرجيهم وشليهم بالماء بحدو وكفيهم على شي زيف ونشفيهم وهاهما جداد

 

6 ــ الى بغيتي حمامك يرجع جديد سخني الخل لبيض وديريه في شي رشاااش وديري عليه مقدار ديال البيكاربونات وحركيه ورشيه سخون على الزليج والفايانس ولفابو والروبينيات والبينوار وتواليت وخليه نصف ساعة ومسحيه وشلي ونشفي وهو حمامك جديد وبدون ريحة مزعجة

 

7 ــ الى كانت عندك خضرة نهاية الشهر دبلانة ولاوية وماعندك فين تجيبيها وبغيتي تديري شوربة ولا الكسكسو حطي الخضرة في شي بانيو فيه ماء باارد مع قطع ثلج وهليها شوية وهاهيا الخضرة جديدة وتقدري تقطعيها

 

8 ــ الى قطعتي ماطيشة شدي القشرة والزريعة وجمغيهم فشي بلاستيكة ودخليها للمجمد وكل ماقطعتي ماطيشة زيدي عليها القشرة وملي تبقاي بلا ماطيشة خرجيها وديريها في شي كاسرولا وديري عليها شويش ديال الماء وديريها على النار حتى تهبط وديريها في الطحان ديال الضوء وطحنيها مزياااان وصفيها وهانتي عندك مطيشة للسباكيتي لروز للحريرة للكسكسو ولونها احمر وطعمها زوين

 

9 ــ الى شاط ليك لعنب غسليه وحيديه من العنقوود وديريه في المجمد وملي يكونو عندك الضياف في الصيف جبديه وقدميه بحال قطع الثلج يبرد المونادا والعصير والماء

 

10 ــ باش تقتاصدي على حبوب اتاي شدي نصف المقدار اللي كاتستعملي وشليه بماء بارد وحطيه في شي كاس كبير ديال الزاج وديري عليه ماء طايب وخليه مغطي ساغتين او اكثر (انا كانديرها بالليل لاتاي ديال الصباح) وملي تبغي تعمري اتاي خوي هذاك الكاس في البراد وزيدي عليه الماء وطيبيه وهانتي عندك اتاي لونو احمر وطعمو رائع وبكمية قليلة

 

11 ــ باش تجيك ماطيشة حمراء وتستافدي منها اكثر طحنيها بالطحان ديال الضوء لان ديال اليد كايحيد القشرة بزااف وهيا سر لونها في القشرة

 

12 ــ باش تحيدي لقشرة بزربة لمطيشة ( الكل كايعرف يديرها 1 دقيقة في الماء الطايب) انا ملي نكون نطيب الخبز كاندخلها دقيقة للفران ونخرجها ونقشرها بكل سهولة وتكون رائعة للسلطة

 

13 ــ باش الزاج ديال الطمبويل ماتشد فيه الغبرة والتراب ملي نغسلو الطموبيل كانشفو وندوز عليه لالكول ديال 90 درجة(l’alcool 90 degrés)

 

14 ــ الى بغيت ندق مسمار او فيس في الخشب وخفتو يطرطق كانشد المسمار ندقو شوية ونخرجو وندير الماء في بلاصة المسمار حتى يتشربو الخشب / العود ومن بعد ندقو او نفيسيه ولخشب مايطرطق

 

15 ــ الى بغيت ريحة براد اتاي تبقى زوينة كانحط فيه قطعة سكر وملي نبغيه كايكون مافيه ولا ريحة

 

16 ــ باش الناموس مايبقاش يدور كانشد حامضة ونقطعها دواير وندخل فيها عواد لقرنفل واقفين ونحطها في شي طبيسلة وكل غرفة نحط فيها قطعة والى الغرف كبيرة نحط اكثر من وحدة

 

 

17 ــ الى تحرقت لي الكيكة من فوق ولا لكراتان (le gratin) كانحيد الفوقاني للكيكة او اي قاطو كاندير الشكلاط دايب او لاكريم فريش مع بعض التزين وللكراتان كاندير صوص بيشاميل وندير عليها الفورماج ونرجعها للفرن مع المراقبة باش مانعود نحرقها هههه

 

18 ــ الى تحرقلي الروز او السباكيتي لكسكسو لحريرة اي اكلة كانشد زيف نرعنو بالماء مزييان ونحط عليه الطنجرة سخونة وهاكا لحراق كايتمص للتحت ومايطلعش طعمو للفوق

 

19 ــ باش الماكلة ديالي ماتجيش مقطوعة ماندريش فيها الكاموون نهائي نهائي لان الكامون كايقطع الماكلة كايجي غير في القطبان ديال المشوي وفي البيض وماطيشة وفي سلطة بطاطة وكايتحط مع اللحم المشوي صافي وراه الطباخة الشاطرة كاتعرف بهذه الميزة

 

 

20 ــ باش يكون دجاج رائع وسوى في الطاجين او في اي اكلة كامنديرش فيه ماطيشة لا طرية ولا ديال لبااط نهائي

 

21 ــ باش الاكل ديالي يطلع بروفيسيونيل بحال ديال كبار الطباخين ماندريش التحميرة ( كاتجي غير في البسطيلة ديال الحوت) والى مانقدرش نستغنى عليها كانشدها وندير شي كاسرولا فوق النار وندير فيها مقدار كبير من التحميرة ونخليها تسخن مع التحرييك وملي يولي الزيت احمر والتحميرة تنزل لتحت نحيدها من فوق النار وخليها حتى تبرد ونصفيها وندير هذيك الزيت في شي قرعة ونكتب عليها وندخلها للثلاجة ونستعملها بدل التحميرة وهكا يكون اللون احمر وماتحرقش لي الطاجين

 

 

22 ــ للبقع على لجوايج كانشد صابون لماعن مع قطرات ديال الحامض ونخلطهم وندهن البقعة ونحليها شي نصف ساعة ومن بعد ندخلها للماكينة تتصبن وهاهيا ترجع تشعل

 

23 ــ الى مشيتي لعند شي حد ودخلتي لتواليت وتحرجتي من الريحة دخلي معك بريكا / ولاعة وشعليها لبعض الثواني وكرري مرة وثنتين والريحة تختفي بالمرة

 

24 ــ الى كليتي الحوت ولا الثوم وانتي باغية الريحة ماتبقاش في فمك مضغي حبة ديال القهوة ولا لقرنفل( انا دائما عندي في صاكي القهوة حبوب)

 

 

28 ــ الى بقا عندي صفر البيض نديرو في شي زلافة وندير عليه الماء حتى يغطيه وندير عليه السولوفان وندخلو للثلاجة وراه كايبقة مزيان حتى 2 اسابيع وملي نبغيه نخوي الماء ونستعملو عادي والى بقات شي قطيرة ديال الماء طوي قطعة ورق ديال الكوزينة وحطيها عليه تمتص الماء وهالبيض جديد

 

29 ـ الى شاط عندي البيض وانا غادي نسافر ومالقيت ماندير بيه كانهرس البيض وكانديرو في شي باطة ديال لبلاستيك (ندير لقياس في كل باطة) ونسد عليه وندخلو للمجمد راه بيقى صالح لمدة شهرين مايجرا ليه والو كانستعملو للكيكة وللامليت وللحلويات

 

30 ــ الى بغيتي قطع الثلج (les glacon) يجو بحال الزاج transparents ماشي مضببين ستعملي ماء معدني او طيبي الماء قبل تديره في المجمد

2 comments

  • oumnia

    hadchi 3andkom rzal tbarak lah 3likom wlah

  • lah ya3tik saha afkar zawina

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *